VITA: Namna Watoto wa Mwaka Mmoja Wanavyobakwa Sudan

Vita na Giza la Unyanyasaji wa Kijinsia

Katika ghasia zinazotikisa Sudan kwa takriban miaka miwili sasa, mateso yasiyoelezeka yanaendelea kutokea. Unyanyasaji wa kijinsia umegeuzwa kuwa silaha ya vita, huku waathiriwa wengi wakiwa wanawake na watoto wadogo – hata wachanga wasiozidi mwaka mmoja. Dunia inaendelea kushuhudia haya kwa macho yaliyokosa mshangao, kana kwamba ni hadithi ya mbali isiyowahusu.

Wanawake na Watoto Walio Kwenye Hatari

Ripoti za Shirika la Umoja wa Mataifa la Kuhudumia Watoto (UNICEF) zinaeleza kuwa vitendo vya ubakaji na unyanyasaji

wa kijinsia vimeenea kwa kiwango cha kutisha. Kesi 221 za ubakaji dhidi ya watoto zimeripotiwa rasmi tangu mwanzo wa mwaka 2024, lakini idadi halisi huenda ikawa kubwa zaidi. Katika jamii ya Sudan, uhafidhina umefanya iwe vigumu kwa waathiriwa na familia zao kuzungumza hadharani. Hofu ya kulipizwa kisasi na makundi yenye silaha inawanyamazisha wengi. Wanakufa kimya, mateso yao yakizama katika giza lisilo na mwisho.

Wavulana Pia Wanateseka

Hali ni mbaya zaidi kwa wavulana, ambao kwa kawaida wanakumbana na changamoto kubwa zaidi wanapojaribu kuripoti unyanyasaji wa kijinsia. Theluthi moja ya waathiriwa wa unyanyasaji huu ni wavulana, lakini sauti zao zinamezwa na hofu, jamii ikiwaacha wakijaribu kupambana na majeraha yanayowala ndani kwa ndani. Katika machozi yao yasiyoonekana, kuna vilio vilivyokosa mwitikio.

Waathiriwa Wachanga na Hadithi za Kutisha

Ripoti ya UNICEF inasema kuwa kati ya waathiriwa 16 waliobakwa wakiwa na umri wa chini ya miaka mitano, wanne walikuwa wachanga. Watoto hawa, wasio na uwezo wa kujitetea, wanakumbana na jehanamu iliyovuka mipaka ya kibinadamu.

Omnia (si jina lake halisi) anasimulia kwa sauti iliyovunjika. “Baada ya saa tisa usiku, mtu mmoja alifungua mlango, akiwa amebeba kiboko. Alimchagua msichana mmoja na kumpeleka kwenye chumba kingine. Nilisikia msichana mdogo akilia na kupiga mayowe. Walikuwa wakimbaka.” Katika kipindi cha siku 19 alizoshikiliwa, aliona wasichana wakirudi wakiwa wametapakaa damu, wakitetemeka, na wakiongea ovyo kwa mshtuko. Kila mmoja wao alikuwa na hadithi ya uchungu, lakini hakuna aliyekuwa tayari kuisikiliza.

Nani Anahusika?

Ingawa UNICEF haikutaja wahusika wa moja kwa moja, ripoti nyingine za Umoja wa Mataifa zimetaja wanamgambo wa Rapid Support Forces (RSF) kuwa wahusika wakuu wa unyanyasaji huu wa kijinsia. Wanamgambo hawa wametajwa kutumia ubakaji kama mbinu ya kuwatisha raia na kuzima upinzani dhidi yao. Katika maeneo kama Darfur, wahanga wengi wa unyanyasaji huu wanalengwa kwa misingi ya rangi yao ya ngozi – Waafrika Weusi wakiwa wahanga wakuu wa vitendo hivi vya kinyama.

Katika mapambazuko ya kila siku, wanawake na watoto waliovunjwa na vita hawaoni mwanga wa matumaini. Wanaamka wakiwa na hofu mpya, wakikumbatia uchungu wa jana na kukabiliana na uhalisia wa kesho isiyo na ahadi. Dunia inashuhudia, lakini inasubiri nini kuchukua hatua?

Mustakabali wa Watoto wa Sudan

Idadi kubwa ya watu waliokimbia makazi yao kutokana na vita imesababisha watoto wengi kushindwa kuendelea na masomo. Umoja wa Mataifa unasema kuwa wasichana watatu kati ya wanne wa umri wa kwenda shule hawaendi shule. Kizazi kizima kinaathirika, ndoto zikizimwa kabla hata ya kuchanua. Watoto wa Sudan wanapoteza utoto wao katika miguu ya wanajeshi, wanakua wakiwa na kumbukumbu za vilio, na wanalelewa katika hofu isiyo na mwisho.

Dunia Itafanya Nini?

Wakati maelfu ya watoto na wanawake wakiteseka, ulimwengu unaendelea kushuhudia bila hatua madhubuti. UNICEF, mashirika ya haki za binadamu, na jumuiya za kimataifa zinaeleza wasiwasi wao, lakini hakuna anayesimama na kusema “imetosha.” Kilio cha watoto wa Sudan kinasikika mbali, lakini kinafifia kila kinapofika kwa wale walio na mamlaka ya kuleta mabadiliko.

Vita vya Sudan si vita vya silaha pekee, bali ni vita dhidi ya utu, haki za binadamu, na maisha ya vizazi vijavyo. Hakuna anayejua lini nuru itarejea, lakini hadi siku hiyo ifike, kila mtoto anayenyanyaswa anasalia kuwa jeraha linalochoma dhamiri ya dunia.

SOMA HII: Ugunduzi wa Kushangaza: Ubongo wa Mwanadamu Wabadilika Kuwa Kioo Baada ya Mlipuko wa Volkano